Friday, July 23, 2010

Hokkaido Ice-cream & Kimchi Noodle

နေ့လည်က အလုပ်ကိစ္စတစ်ခုနဲ့ Singapore Riverside ဘက်ရောက်ဖြစ်တယ်..။ ကိစ္စတွေပြီးလို့နာရီကြည့်တော့ (၁)နာရီခွဲခါနီးပြီ..နေ့လည်စာလည်းမစားရသေးတော့ နီးနီးနားနားမှာရှိတဲ့ Central Mall မှာဘဲစားဖြစ်ပါတယ်။ စားခါနီးမှ ဘလော့မှာ အစားအသောက်အကြောင်းမရေးဖြစ်တာကြာပြီိဆိုတာ သတိရတယ်..။ ကင်မလာလဲပါလာတော့ ( ၂ ကျပ်ခွဲတန်ကြီးတော့ဘယ်ဟုတ်မလဲ )လှလှပပလေးရိုက်ပြီးမှဘဲ စားမယ်လို့ကြံစည်ထားတယ်..။ ဆိုင်တွေရွေးရင်းနဲ့ ကြာတော့ခေါင်းတွေရှုပ်လာပြီး နောက်ဆုံး ကိုရီးယားဆိုင်မှာဘဲ ဂိတ်ဆုံးတော့တယ်..။ ဘာစားရင်ကောင်းမလဲလို့ကြည့်တော့ ထမင်းနဲ့စားရတာတွေက အမဲသားနဲ့ ငါးတွေချည်းဘဲ..၊ အမဲသားမစား ငါးဆိုလည်းမကြိုက်တော့ နောက်ဆုံးကင်ချီခေါက်ဆွဲဘဲစားဖြစ်တယ်..။

ကင်ချီဆိုလို့ ကိုရီးယားလူမျိုးတွေအသားအရည်လှတာ ကင်ချီစားတာကြောင့်လို့ဆိုတယ်..။ အဲဒါ အစ်မ၀မ်းကွဲတစ်ယောက်က အားကျလွန်ပြီး ကင်ချီတွေချည်းစွတ်စားတာ အသားအရည်တော့မသိဘူး..အစာအိမ်အချဉ်ပေါက်ပြီးဆေးခန်းပြလိုက်ရတာဘဲအဖတ်တင်တယ်..။ တကယ်တော့ အဲယားကွန်းအခန်းထဲမှာ ၂ နာရီလောက်နေပြီးတော့ လူကချမ်းလည်းချမ်း ဗိုက်ကလဲဆာဆိုတော့ ပူပူနွေးနွေးလေးစားမယ်ပေါ့..။ အဟမ်း အရသာကိုပြောရမယ်ဆိုရင်တော့ စားလို့ကောင်းပါတယ် လူကလည်းဆာနေတာဆိုတော့ စားသမျှကောင်းနေတာပဲ..။ အရောင်ကနီရဲနေပေမယ့် လုံးဝမစပ်ဘူး.. တုန်ရမ်းစပ်စပ်တောင်အပျော့ဘဲဆိုတော့ ဒီလောက်ကတော့ထည့်မပြောချင်ဘူးဗျာ.. ;D။
ဝက်သားရယ်၊ ကြက်ဥရယ် ၊ ကင်ချီရယ် ၊ ခေါက်ဆွဲရယ် ပြီးနောက်အရွက်စိမ်းစိမ်းတစ်မျိုးပါပါတယ်..။ ပုံမှာသာထည့်ရိုက်ထားတာ အရွက်ဆို ခပ်စိမ်းစိမ်း ၀ါးလိုက်လို့ ကျလိကျလိဖြစ်နေရင်လုံးဝမစားပါ..။

ဒီဂျူလိုင်ကစပြီး အလုပ်စလုပ်ပါပြီ..ဘ၀မှာပထမဆုံးအလုပ်ပေါ့။ အစပိုင်းတော့ နည်းနည်းစိတ်ဖိစီးသလိုဖြစ်ပေမယ့် နောက်ပိုင်းအဆင်ပြေသွားမယ်လို့ထင်ပါတယ်..။ အလုပ်မှာ မပင်ပန်းပေမယ့် ကိုယ့်ကိုကိုယ်သနားတဲ့အနေနဲ့ ရေခဲမုန့်လေးအဆစ်ကျွေးလိုက်သေးတယ်..။ စားဖြစ်တာက Hokkaido ရေခဲမုန့်ပါ..။ ပထမနေ့က Double Berry နဲ့ Sea Salt Caramel စားတယ်.. ငံငံအေးအေးလေးစားလို့ကောင်းတယ်...။ ဒီနေ့ Strawberry နဲ့ Green Tea စားတယ်.. Green Tea အပိုင်းတော့မကြိုက်ဘူး အနံ့တစ်မျိုးကြီးဘဲ ဒါနဲ့ အရင်ကုန်အောင်စားလိုက်တယ်..။

ရေခဲမုန့်ဆိုလို့ကတော့ တွေ့နဲ့နေရာစားတယ်၊ ဈေးကြီးပေးရလည်းစားတယ် ဈေးသက်တာတဲ့ဟာလည်းစားတယ်..။ ငယ်ငယ်တုန်းက ဖျားရင်လည်း ရေခဲမုန့်ကိုဘဲစားချင်နေတာ.. အာသီးရောင်တာလည်း ခဏခဏပေါ့..။ မှတ်မှတ်ရရ ၁၀ တန်းအောင်တုန်းက အမျိုးတွေကိုအိမ်မှာ ဖိတ်ကြွား အဲ..ဖိတ်ကျွေးတုန်းကလည် ဇာတ်လိုက်ကျော် ထူးရေခဲမုန့် ၂ ဂါလံလဲပါတာပေါ့။ အားလုံးစားပြီးတာတောင် ၁ ဂါလံကတစ်ဝက်လောက်ပဲလျော့တယ်.. ကျန်တာအီဖေကိုယ်အတွက်ပဲပေါ့..။ ငှင်းငှင်း ၁ ဂါလံခွဲကို ညမရောက်ခင်တစ်ကိုယ်တော် စားလိုက်လို့ အားလုံးကတော်ပါတော့ ပြောယူရတယ်... အဲသလို။ ကြီးတော်ကပြောသလိုပေါ့.. ကျန်တာဆိုရင်တော့အမျိုးတော်တယ် ရေခဲမုန့်နဲ့ပတ်သက်လာရင်တော့ အမျိုးမတော်ဘူးဆိုတာ သူမှအစစ်တဲ့..။ ကဲကဲ..ပြောတာများသွားပြီ အခုလိုပေါက်ကရတွေကိုလာဖတ်ပေးတာကိုဘဲ ကျေးဇူးအထူးပါ..။

Sunday, July 11, 2010

ထာဝရ

photo credits to hoshinavi

ရွက်ကြွေဆောင်းရဲ့
အထီးကျန်အဆန်ဆုံး လမ်းမပေါ်မှာ
အဖော်မဲ့စွာ....
တိတ်ဆိတ်စွာ...

မှောင်မိုက်လွန်းတဲ့ ညနေခင်းမှာ
ခပ်ကြမ်းကြမ်း ရွက်ခြောက်တွေအလယ်
ညဥ့်ငှက်တစ်ကောင်ရဲ့
ခပ်စူးစူးအသံသာ
ပဲ့တင်သံ ထပ်လို့နေတယ်....

ကဗျာတစ်ပုဒ်ရေးကြည့်မယ်
လွဲစရာအကြောင်းပြချက်ရှာမတွေ့တဲ့
တစ်ခြားမဟုတ်တဲ့..
အေးချမ်းစွာ ရှိနေမယ့်
အချစ်ဆုံး..မင်းလေးရဲ့အကြောင်း.....

ရေးရင်း..တွေးရင်း
ခံစားမှုတွေ ပုန်ကန်တယ်
အကြောက်တရားတွေ နိုးထတယ်
ခါးသီးမှုရနံ့တွေ ပြင်းပြလာတယ်
အလွမ်းတွေလား..
အို...သူတို့ ရင်ကိုမွန်းကြပ်စေပြီ
ညှဉ်းပန်းမှုရဲ့ အဆုံးမှာတော့..
ဒဏ်ရာပြင်းတဲ့ နှလုံးသားမှာ
အစွန့်ပစ်ခံ နှင်းဆီတစ်ပွင့်လို........

နှုတ်မဆက်ဘဲထွက်ခွာသူရယ်
ရင်ခုန်သံကို ဆွံ့အစေတယ်..
မင်းမကြားလိုက်တဲ့ စကားတွေရယ်
မင်းမခံယူလိုက်ရတဲ့ ချစ်ခြင်းတွေရယ်
အားလုံးကို အပြီးပိုင်
နှလုံးအိမ် ခေါင်းတလားမှာ
သိမ်းထားလိုက်တော့မယ်.........

တကယ်နောက်ဆုံးမှာတော့
ကိုယ်အရိုးသားဆုံးဆုတောင်းလိုက်မယ်
မနိုးသောအိပ်စက်ခြင်းမှာ
မင်းတစ်ယောက်
ထာဝရ အေးချမ်းစွာ
မွေ့ပျော်ဖို့ရယ်
........

Saturday, July 10, 2010

မပြောဖြစ်ခဲ့ဘူး

အို..
စံပယ်ဆိုရင်လည်းဝေ
ခရေဆိုရင်လည်းကြွေပါစေတော့
ဘာပဲ ပေးဆပ်ရပါစေ.....

အဖိုးတန်နှင်းဆီတွေလို
ယစ်မူးစွဲလန်းစေတဲ့ ကံ့ကော်တွေလို
မွှေးရနံ့..မထုံလွှမ်းရင်နေပါစေ..
အရိပ်ခိုသူတိုင်းကိုတော့...
မင်းရဲ့အပြုံးတွေနဲ့..
ပြေပါစေလေ ဘ၀အမောတွေ.......

မျက်ရည်တွေခမ်း
နှလုံးသားလည်းနွမ်းခါမှ
ချစ်ခြင်းမုတ်သုန်လေတွေ
အနောက်တောင်ယွန်းယွန်းမှာ တအိအိပြိုကျလို့.....

အခုချိန်မှာလေ
ခံစားချက်တွေက..
ရာသီစိုစိုမှာ တစ်ပေါက်ပေါက်ကျဆင်းလို့ရယ်..
ဒါပေမယ့်..
တစ်ချိန်တုန်းကတော့
မင်းကိုသိပ်ချစ်တယ်လို့.....................ကိုယ်မပြောဖြစ်ခဲ့ဘူး......။

(ကဗျာလေးရေးပြီးမှာ တိုက်တိုက်ဆိုင်ဆိုင်ဒီသီချင်လေးတွေ့တယ်.. ကြိုက်လို့ပြန်လည်မျှဝေပါတယ်)

Sunday, July 4, 2010

မို

အခါလွန်မိုးတွေ
ခပ်စွေစွေရွာတယ်..
သို့ပေမဲ့လည်း..
အတူစီးဆင်းဖို့အတွက်တော့
မြစ်တစ်စင်းဖြစ်မလာခဲ့...။

ကော်ဖီခပ်နွေးနွေး..
ဖြည်းဖြည်းမော့သောက်မိတယ်..
သို့သော်..
နောက်ဆုံးအချိန်ရောက်နေတဲ့ အာရုံတစ်စအတွက်တော့
အသက်ကယ်ဆေး မမှီခဲ့..။

ရင်ခုန်သံတွေ
ွထိန်းမရအောင် ကျယ်လောင်နေတယ်
ဒါပေမယ့်
မင်းနှလုံးသားကိုနှိုးထဖို့အတွက်..
အသံချဲ့စက်တစ်ခုတော့ ထပ်ပြီးလိုအပ်နေမလားဘဲ..။

အချစ်ရေ..
စကားတွေလည်း ထပ်ပြီးမဆိုချင်ဘူး
အတွေးများလည်း အလေလွင့်မခံနိုင်တော့ဘူး
အိပ်မက်တွေလည်း အခါခါလန့်မနိုးချင်တော့ဘူး
အဆုံးမှာတော့
မင်းကို ကိုယ်တကယ် လက်မလွှတ်နိုင်တော့ဘူး..။

Thursday, July 1, 2010

Miley Cyrus Medley ( by Christina Grimmie)

အခုချိန်မှာတော့ Miley Cyrus လို့ဆိုရင် လူတော်တော်များများသိကြမယ်လို့ထင်ပါတယ်..။ သူ့သီချင်းတွေကို နေရာတိုင်းလိုလိုကြားနေရတာကြာပါပြီ Mall တစ်ခုခုဝင်သွားလိုက်ရင် Store ဆိုင်တစ်ခုခုကဖွင့်ထားတာဖြစ်ဖြစ်.. စားသောက်ဆိုင်တစ်ခုခုမှာ ၀င်စားရင်ဘဲဖြစ်ဖြစ် သူ့သီချင်းတွေကိုအချိန်တော်တော်များများမှာကြားရမှာပါ..။ ဆယ်ကျော်သက်လူငယ်တွေကလည်း Miley Cyrus နဲ့ သူ့သီချင်းတွေကိုဆိုအသဲစွဲပါ.. (ကျွန်တော်ကတော့ ဆယ်ကျော်သက်ဘ၀ကို လတ်လတ်ဆတ်ဆတ်ကြီးဆုံးရှုံးထားသူပါ.. (ဘာမှလည်းမဆိုင်ဘူး.. (;))။ တကယ်တော့ဆိုလိုချင်တာက လူကိုသဘောမကျပါဘူး.. ဒါပေမယ့်လို့.. သူ့သီချင်းလေးတွေတော့သဘောကျပါတယ်လို့ပြောချင်တာပါ..။ တစ်ချို့သီချင်းတွေဆို သံစဉ်အလိုက်တွေလည်းကောင်းတယ်.. စာသားတွေလည်းကောင်းပါတယ်.. ဒါပေမယ့် သူ့အသံနဲ့ မလိုက်ဘူးလို့ထင်လို့ပါ..။ စကားပလ္လင်ခံတာတော့များသွားပြီ.. တကယ်တော့ ဒီပို့စ်က Miley နဲ့တော့သိပ်မဆိုင်လှပါဘူး.. သို့သော်လည်း သူ့နာမည်ကပါနေတော့လေ..။



ဒီ Music Video လေးကိုအထပ်ထပ်အခါခါကြည့်ဖြစ်နေတာကြာပါပြီ...။ Miley ရဲ့သီချင်းကောင်းတော်တော်များများကို စုပြီး Medley လုပ်ထားတာပါ..။ ဆိုတဲ့အဆိုတော်လည်း သဘောကျတယ် ၊ MV လုပ်ထားတဲ့အတွေးလေးလည်းကောင်းတယ်..၊ ပြီးတော့ သူ့အသံနဲ့ ပိုပြီးလိုက်ဖက်တယ်ထင်လို့ပါ..။ ခဏခဏကို ..မကြာခဏကို.. အမြဲတမ်းလိုလို.. အချိန်ရတိုင်းကို ...သတိရတိုင်းကို နားထောင်ပါတယ်.. (; ။ တကူးတကလာလည်သူများ ၊ မျက်စိလည်လမ်းမှားရောက်လာသူများ.. အပျင်းပြေသီချင်းလေးနားထောင်သွားပါ ခင်ဗျာ..။